Во извештајот на Меѓувладиниот панел за климатските промени (IPCC), објавен во Јокохама, Јапонија, се наведува дека влијанието на климатските промени веќе се чувствува, но дека негативните последици ќе бидат уште поголеми со секое зголемување на температурата.

Според извештајот, ќе дојде до проблеми со снабдувањето со храна поради намалениот род на пченица, ориз и пченка. Промените во температурата ќе ја зголемат цената на храната од 3 до 84 проценти до 2050 година. Истовремено, промената на климата ќе ги засили постоечките здравствени тегоби, а се повеќе луѓе ќе умираат поради високите температури, лошата исхрана и разни болести.

Експертите на ОН оценуваат дека порастот на температурата може да придонесе до поголем ризик од воени судири поради зголемување на сиромаштијата.

Во извештајот се напоменува дека северна Европа ќе биде најзагрозена од поплави, високи температури и суши.

ОН повикуваат на намалување на емисијата на штетните гасови и помош на ранливите групи за полесно да се прилагодат на неизбежните климатски промени.

Експертите предвидуваат пораст на температурата од 0.3 до 4.8 степени Целзиусови и пораст на нивото на океаните од 26 до 82 сантиметри до 2100 година.

Последниот извештај на IPCC беше објавен во 2007 година.