Aпликацијата им овозможува на граѓаните и посетителите на Скопје да ги добијат сите потребни информации за да го испланираат своето патување до различни дестинации во градот на најбрз, најевтин и „најзелен“ начин. Податоците за емисиите на јаглероддиоксид се тие што всушност им помагаат на патниците да го направат „најзелениот“ избор.
Популарна, иновативна и напредна. Аликацијата овозможува Скопје и Македонија да се доближат до Европа и до светот бидејќи го користи Google Transit, дел од Google Maps – кој им овозможува на корисниците да ги планираат патувањата во градот со јавниот транспорт, со тоа што дава насоки за најблиските автобуски станици и најпогодните линии.
Градоначалникот на Скопје, Коце Трајановски, изјави: „Со оваа апликација, Скопје станува првиот град во поширокиот регион на Балканот кој го инкорпорирал својот распоред на јавен транспорт со веб-сервисот на Google – оваа апликација ќе им овозможи на граѓаните и на туристите многу полесно да се движат низ градот”, и додаде дека Град Скопје постојано работи на подобрување на сообраќајната инфраструктура, обновување на клучните улици и булевари и градење на повеќе велосипедски патеки.
„Патувај Зелено“ не само што ги информира корисниците за распоредот на автобусите, места каде што може да се изнајмат велосипеди и соодветни паркинг-локации, туку исто така дава и информација во реално време за метежот во сообраќајот и загадувањето на воздухот. Овие податоци се достапни благодарејќи на сензорите кои се поставени на главните раскрсници во градот.
Постојаниот претставник на УНДП Луиза Винтон ја пофали иновативната употреба на „големи податочни бази”. „Овој проект покажува дека климатските решенија засновани врз анализи и податоци можат да помoгнат секаде во светот и дека лидерите од сите сектори можат да работат заедно за да изградат побезбедна, поздрава и позелена иднина”.
„Апликацијата е одличен спој меѓу модерната технологија и транспортниот систем" вели Деканот на ФИНКИ, Димитар Трајанов. „Оваа корисна интерактивна апликација овозможува граѓаните да бидат подобро информирани кога избираат начин и средство за патување. Од друга страна истата лесно би можела да се реплицира и во другите градови низ Македонија”.
Проектот беше избран како еден од 7-те најдобри проекти на глобален натпревар за иновации на Обединетите нации кој имаше за цел да ги прикаже можностите за користење на големи податочни бази во борбата против климатските промени.
Исто така, апликацијата ќе биде претставена на претставници од влади и јавен и приватен сектор за време на серијата настани поврзани со Климатскиот Самит на Обединетите нации, кој ќе се одржи во Њујорк на 23 септември.