Според него, заштитата на културното наследство стои високо на приоритетната листа, како сведоштво за идентитетот кое го детерминира битисувањето на еден народ, но истовремено забележливо е дека кај луѓето, полека но сигурно, се менува мислата, перцепцијата и културата на живеење, а со тоа и пристапот во справувањето со климатските промени, што доведува до надградување на капацитетот и зголемување на ефикасноста при делувањето на тоа поле.
На настанот говореа и министерката за култура, Елизабета Канчевска Милевска, постојаниот претставник на УНДП во Македонија, Луиза Винтон и заменик на германскиот амбасадорот во Македонија, Ханс Хелге Сандер.
Извештајот е изработен од Институтот за управување со културното наследство во Германија со поддршка на Министерството за животна средина, Министерството за култура, Германското друштво за меѓународна соработка и Програмата за развој на Обединетите нации и ќе биде дел од Третиот национален извештај за климатски промени. Поткрепен со фотографии и краток филм снимен на локалитетите, извештајот го презентираше Мајкл Шмит од Институтот за управување со културното наследство кој е и негов изготвувач заедно со Брита Рудолф.
Документот содржи анализа на можните влијанија предизвикани од климатските промени и предлог мерки за адаптација и соодветна заштита на три локалитети: Аквадукт, Стоби и Плаошник. Извештаите за овие локалитети ќе послужат како добра основа за мултиплицирање на методологијата и истражувањето врз останатите културни добра.